午睡時間

琴日爸爸突然食晏時間返嚟屋企，係咪想特擊檢查我哋呢? 無理由丫，我成日都咁乖，係芘芘無我咁乖。我知啦! 一定係太掛住我哋 ... 不過正值我哋午睡時間，真係睡魔急CALL。唔好意思，爸爸你自己招呼自己啦。

 

嘩! 人哋都話要午睡，做咩仲影我喎 .......

古怪睡姿

星期一媽媽要返工，我哋唯有等媽媽返嚟先同佢玩。等等吓開始眼訓 ... 你哋睇吓芘芘訓到幾無儀態，成個超人咁。

 

我都要表演吓 ... 毛蟲式訓覺!

星期六下雨早晨

今日星期六早上，個天不停落雨。既然太陽伯伯休息，我哋兩個都只好留係屋企。點解媽媽自己去街 ... 妳去邊呀?! 我哋兩個好似坐地鐵咁企定係門口等。

 

十分鐘過後 ...... Laugh仔: 芘芘，媽媽真係自己去街。點解唔同埋我哋去街?! 媽媽終於返黎啦， 原來去咗買早餐同爸爸食。

失蹤

邊個失蹤?! 咪係媽媽囉 ... 今晚明明係星期二，點解成10點都未返。悶到我哋左坐右坐 ...... 係咁等。你哋睇吓芘芘等到幾無儀態，佢都懶理爸爸偷影佢。

 

其實我都好悶，雖然爸爸有同我哋玩。不過我哋都係要等媽媽番嚟同我哋玩，加上如果我哋乖媽媽就會俾零食我哋食 。 不過都係嗰句 ... 我哋幾時都咁乖!

等等吓 ... 我都無儀態 ... 做咩偷影我呀?!

等我坐番好，幾有儀態。免得爸爸又影俾媽媽睇，破壞我美好形象!

Mikiki 遊

今日媽媽同爸爸帶我哋去街，去街已經開心啦，仲要係好去傳聞可以俾寵物自由行既商場。

到達商場後只要喺入口俾$300按金，就可以借寵物車。我哋仲借咗架雙人車，實在好興奮!

除左可以飛車之外，仲有女人最鐘意既活動 ...... 就係濕平。你哋睇吓芘芘幾失控就知道啦!

 

我哋喺商場見到唔少狗狗朋友，仲有一隻白松鼠仔對我好有興趣，仲想跳過嚟我吔架車。不過佢係仔仔囉，等芘芘成日讃自己可愛，其實我都好吸引 ... 嘻嘻!!!

當媽媽同芘芘去左濕平，我當然做番一啲男人鐘意做既野 ...... 飛車 ... 唬唬唬! 仲要係有人推我飛車 ... 哈哈。

不過呢個可以俾寵物自由行既商場，商場內既餐廳都唔可以俾寵物入內。我哋最後要偷渡媽媽佢哋先可以入到餐廳食嘢。食飽飽就飛車離開 ..... 不過係爸爸飛車。

呆等

每個星期三同四都係要我哋等佢門，而家成10點幾都未返。想悶死人咩!

 

轉吓乳豬POSE繼續等

 

妳終於捨得返屋企，開心到要舞獅助慶!

突如其來的假期

因為八號風球關係，有一個突如其來假期。加上芘芘又康復，所以今日同兩隻毛球沖涼。等佢哋星期六可以香噴噴咁去街。

妳剩係讚芘芘靚女，我夠好靚仔啦！

嘻嘻，我又真係既靚女又可愛。

芘芘病了

芘芘平時食飯好乖好爽快，最多係要摸吓佢同吓讚之後佢就食飯。唔會好似Laugh 仔咁玩一陣先食少少咁，再玩一陣先再食少少。琴晚芘芘唔食飯，連今朝早餐都唔食。芘芘腸胃一向都唔好，每隔兩、三個月就會唔舒服。其實已經無咩零食俾佢食，都唔明點解仲會咁。如果聽日朝早芘芘都係咁，我諗要同芘芘去睇VET。

 

休息日

琴日玩完返屋企，就已經到我哋唔想郁。其實只係出咗去食飯 ... 正確係睇食飯同探吓人。

但係今日我哋都係到唔想郁。所以今日名副其實嘅"休息日"。

家庭樂

星期六係我哋既日子，果然媽媽攞咗我哋個袋出嚟。唔理咁多跳左入去先，免得唔得記帶我地出去。不過好快俾媽媽捉我哋出嚟，同我哋帶番條安全帶，成條螢光色仲唔係安全帶。

 

媽媽要我哋安靜先可以出街，終於浪費咗我哋半個鐘先同我地出門口。今日太陽伯伯好犀利，我哋急急腳跟住爸爸。

坐車我哋都想睇風景，不過窗門得一個，我哋只可以 ... 爭! Laugh 仔唔好推啦，而家唔係坐地鐵呀，唔好再推啦!!!

原來今日食法國菜，好嘢! 我哋食咩餐好呢?! 咩事呀，點解放我地落地。咩話，餐廳話狗狗唔可以入內，所以要放我哋喺地下。喂喂喂! 我哋食唔到嘢wor。

-佢哋食飽之後，就上左嫲嫲屋企。坐吓飲吓嘢，睇吓海景 ... 真係好寫意。

黃昏遊

今日媽媽出去做野所以可以早放工，一番屋企就立即同我哋去行街街。不過點解佢可以未夠六點就返到?! 佢上司都會睇我哋動向，咁點算! 唔理lu，玩完先算。

 

好開心平日好少可以同我哋出街，而且今日只係同我哋倆個去街，唔係去超市或者銀行囉。咁晏太陽伯伯都仲好勁，晒到我哋都睜唔開眼。唔好掛住影相啦，好晒呀!

 

呢邊有地方遮太陽，快啲過來呢邊。

除左行平台之外，仲同我地落街散步tim。

嘻嘻!好多人見到我哋都想同我地玩，原來我哋咁吸引!

等門

自從Laugh仔同我成為呢個家既一份子，已經有一年多。點解好似好感慨?! 咪就係逢星期三同星期四，媽媽都係好夜先返屋企。成日都要我同Laugh仔等佢門。

咁耐都未番，好悶呀。好似番到啦!

爸爸話當媽媽唔係屋企，我哋兩個就無晒心機。當然啦!如果我地乖，媽媽一番屋企多數會獎零食俾我地食。不過我幾時都咁乖，Laugh仔就難講。睇吓Laugh仔一見零食就好瘋狂，我都唔可以執輸 ... 搶呀!

• 毛球生活